Алматы мәслихатының Қоғамдық даму, мәдениет, спорт, дін және жастар жөніндегі комиссияның отырысында қала көшелеріне атау беру мәселесі қаралды деп жазады ҚазАқпарат.
Отырысқа Алматы қаласы мәслихатының төрағасы Мейіржан Отыншиев және өзге мәслихат депутаттары, сондай-ақ Алматы қаласы әкімі аппаратының тілдерді дамыту және ономастика бөлімінің басшысы Бақыт Қалымбет қатысқан.
Жарияланған отырыс хаттамасына сәйкес, Алматыда 156 көшеге жаңадан атау беру жоспарланған.
Атап айтқанда, Алатау ауданы бойынша 10 көшеге, Әуезов ауданы бойынша 4 көшеге, Бостандық ауданы бойынша 45 көшеге, Жетісу ауданы бойынша 4 көшеге, Медеу ауданы бойынша 7 көшеге, Наурызбай ауданы бойынша 86 көшеге жаңа атау беру қарастырылған.
Бостандық ауданының «Архат» шағын ауданындағы 7-көшесіне Олимпиаданың қола жүлдегері Денис Теннің, Алатау ауданында ғалым, абайтанушы Қайым Мұхамедханов және вьетнамдық қоғам қайраткері Хо Ши Мин есімдерін, Жетісу ауданында Ұлы Отан соғысының ардагері Шәңгерей Жәнібековтің және өзге де тарихи тұлғалардың атын беру жоспарланған.
Kazinform сауалына жауап берген Алматы қаласы әкімі аппаратының тілдерді дамыту және ономастика бөлімінің мәліметінше, көше атауларын өзгерту мәселесі алдағы уақытта Республикалық ономастика комиссиясына қаралады.
Еске салайық, былтыр Алматыда Гагарин даңғылының бір бөлігіне Ермек Серкебаевтың, Түрксіб аудандарындағы атаусыз көшелерге Ескендір Хасанғалиев пен Юрий Померанцевтің және Әуезов ауданындағы Юбилейная көшесіне Владимир Толоконниковтың есімі берілді.
