Облыс орталығы мәртебесінен ие болған Түркістан қаласында соңғы бір жылдың ішінде кәсіпкерлік саласы айтарлықтай дамып, көптеген оң өзгерістер орын алуда. Мәселен бұрын Түркістанда индустриалды аймақ 40 гектар болса, қазіргі таңда оған 310 гектар қосылып жатыр.
Қала әкімі Рашид Аюповтың айтуынша шаһардағы индустриялды аймақ өзге қалалардан ерекше дейді. «Еліміздің басқа қалаларында индустриялды аймақтар салалық болып бөлінеді, аграрлық индустриялды аймақ деген секілді. Ал, Түркістанда барлығы бір жерде орналасады. Кез келген инвестор қаржысын салып, қалаған бағытында жұмыс істей береді. Жалпы бәрін топтастырып бір аймақта орналастыру өте дұрыс шешім деп есептеймін. Өйткені жеріміз онша үлкен емес, бар болғаны 19 мың 600 гектар. Оның 350 гектары индустриалды аймақ», - дейді қала басшысы.
Сала мамандарының айтуынша бүгінде қалаға инвесторларды тарту жұмысы қызу жүруде. Сондай-ақ кәсіп ашамын деушілерге мемлекеттен көрсетілетін жеңілдектер көп, қала әкімдігі тарапынан да қолдаулар баршылық.
