Орал қаласы сәулет және қала құрылысы бөлімінің бұрынғы басшысы Мұратбек Ташенбаев пен бас маман Нұрсұлтан Ғатауға қатысты үкім шықты. Бұл туралы ҚазАқпарат жазады.
Орал қалалық сотында қаралған қылмыстық іс бойынша оларға ҚР ҚК 366-бабы 2-бөлігі, 3-бөлігі 4-тармағы, 361-бабы 4-бөлігі 3-тармағына (пара алу және лауазымдылық өкілеттіктерді теріс пайдалану) сәйкес айып тағылды. Сондай-ақ ЖШС директорының орынбасары Асылжан Көпбаев ҚР ҚК 367-бабы 3-бөлігі 3-тармағымен (пара беру) айыпталды.
Сот талқысында мәлім болғанындай, 2023 жылы наурызда А.Көпбаев сәулет, қала құрылысы, құрылыс қызметі және жер қатынастары саласында рұқсат құжаттарын алу бойынша жеке және заңды тұлғаларға қызмет көрсете жүріп, қосымша жер телімін алу мәселесімен Н.Ғатауға жолыққан.
Содан кейін Н.Ғатауда қылмыстық ой пайда болып, жер комиссиясында мәселенің оң шешілгенін біліп, А.Көпбаевтан 500 мың теңге көлемінде пара талап еткен. ЖШС директорының орынбасары бұған келіскен.
Сондай-ақ 2023 жылдың сәуірінде Н.Ғатауға танысы қосымша жер теліміне қол жеткізуге көмектесуін өтінген. Бас маман қылмыстық ойын бөлім басшысы М.Ташенбаевпен бөліскен. Бұған М.Ташенбаев келісім беріп, Ғатаудың танысының өтінішін Орал қаласы әкімдігі жанындағы жер комиссиясы отырысында қарау үшін жер қатынастары бөліміне жазылған хатқа қол қойған. Осылайша, Н.Ғатау лауазымдық өкілеттіктерін теріс пайдалана отырып, 2023 жылы ақпан мен наурыз аралығында танысынан 5 млн теңге алған.
Іс мұнымен бітпей, 2024 жылдың қаңтарында А.Көпбаев тағы бір танысының атынан М.Ташенбаевтан Орал қаласында үш қабатты көппәтерлі тұрғын үй құрылысының сәулет-жоспар тапсырмасын бекітіп, эскиздік жобасына келісім беруін өтінген. Барлық құжатты қарағаннан кейін М.Ташенбаев кабинетінде А.Көпбаевтан 1 млн теңге талап етіп, ол көп ойланбай келіскен.
М.Ташенбаев пен Н.Ғатаудың лауазымдық өкілеттіктерін теріс пайдалануы салдарынан мемлекетке аса ірі көлемде 91 млн 968,453 мың теңге залал келтірілген.
Сотталушылар кінәсін мойындап, жасаған әрекеттеріне толық өкінетінін білдірді.
М.Ташенбаев 7 жылға бас бостандығынан айыру жазасын қауіпсіздігі орташа қылмыстық-атқару жүйесі мекемесінде өтейтін болды. Бұған дейін үйқамақта болған Ташенбаев сот залында тұтқындалды.
Н.Ғатауға 3 жыл 6 айға бас бостандығынан айыру жазасы кесілді. Ешқайда кетпеу туралы қолхатпен жүрген оның қолына кісен салынды. Пара бергені үшін А.Көпбаев 7 жылға бас бостандығынан айырылды. Кепілмен еркіндікте жүрген ол да сот залында тұтқындалды. Олардың үшеуі де мемлекеттік қызмет атқару құқығынан өмір бойына айырылды.
Сот үкімі күшіне енген жоқ.
