Өзбекстанның Бұхара облысындағы «Бұхара-Орал» магистральдық газ құбырының 106 шақырымында апат болды, деп хабарлайды Kazinform агенттігінің меншікті тілшісі.
Облыстық Төтенше жағадайлар басқармасының мәліметінше, құбырдың диаметрі 1020 мм болатын бөлігі қысым салдарынан жарылған.
— Мамандар жедел әрекет етіп, газ жіберетін клапандарды жапты. Тиісінше, құбырдың бойында қалған көгілдір отын шығып, өрт толық сөндірілді, — делінген ведомство таратқан хабарламада.
Төтенше жағадайлар басқармасының ақпаратына сай, зардап шеккендер мен қаза тапқандар жоқ.
«Бұхара-Орал» газ құбыры Өзбекстаннан басталып, Қазақстан арқылы Ресейге өтеді. Оның ұзындығы 4,5 мың шақырымнан асады.
Қазіргі уақытта бұл құбыр Өзбекстанның ішінде көгілдір отын тасымалдау үшін қолданылып келеді.
Еске салайық, былтыр Өзбекстан газ импортын 2 есе арттырды.
Көгілдір отын өндірісін ұлғайту мақсатында аталған ел үкіметі биыл 15 учаскеде геологиялық барлау жүргізбек.
Сонымен қатар, 2024 жылы газ бен электр энергиясын заңсыз пайдаланған өзбекстандықтар мемлекетке $108 млн шығын келтірді.
