Бір жылда елде 55 жылу орталығы жаңғыртылды, деп хабарлайды 24kz. Үкімет осы саланы дамыту мақсатымен ұлттық жобаны іске асырып жатыр. Бұл туралы Премьер-министр Олжас Бектеновтің Солтүстік Қазақстан облысына жұмыс сапары барысында айтылды. Үкімет басшысы өңірдің коммуналдық-энергетикалық инфрақұрылымының жай-күйімен танысты. Мәселен Петропавл 2-ші жылу электр орталығын жөндеу жұмысы айтарлықтай алға жылжыған. Былтыр қазандықтары мен турбиналарына күрделі жөндеу жүргізілді. Мұнда төрт турбинаны жөндеу жұмыстары мен биіктігі 180 метр №1 түтін мұржасының құрылысы аяқталды. Қалған жөндеу жұмыстары жалғасып жатыр. Көмір мен мазут жеткілікті. Қазір қорда 183 мың тонна көмір, 1833 тонна мазут бар. Энергетика министрлігі биыл нысанды қауіптің «қызыл» аймағынан «сары» аймағына шығаруды жоспарлап отыр.
