ҚР Бас прокурорының орынбасары Әсет Шындалиев Интерпол «Астана LRT-ның» бұрынғы басшысы Талғат Арданның нақты қайда жүргені туралы мәлімет бермегенін айтты.
— Іздеудің бірнеше түрі бар. Біздегі құқық қорғау органдары негізінен ел ішіндегі іздеумен айналысады. Халықаралық іздеу құзыреті Интерполға тиесілі. Біз Интерполға тиісті нұсқау береміз, олар осымен айналысып жатыр, — деді Әсет Шындалиев Сенаттың жалпы отырысынан кейін тілшілер сұрағына жауап бере отырып.
Оның айтуынша, экстрадициялау үшін Интерпол іздеуде жүрген адамның орналасқан жерін нақты анықтап, шетелдің құзырлы органдарымен бірге ұстау шараларын ұйымдастыруы керек. Осыдан кейін экстрадициялауға сұрау жіберіледі.
— Әзірге, Интерпол бұл адамның қайда екенін немесе қамауға алу шараларының орындалу барысы туралы нақты мәлімет берген жоқ, — деді Бас прокурордың орынбасары.
Бұдан бұрын хабарланғандай, 2023 жылы мамырда елордада салынбай қалған Astana LRT құрылысына қатысты қылмыстық іс бойынша сот үкімі шықты. Сот үкімімен Талғат Ардан мен Қанат Сұлтанбеков 7 жылға сотталды.
Бас прокуратура Талғат Ардан мен Қанат Сұлтанбековті іздеу жұмысының тоқтамайтынын айтты.
Еске салсақ, Астана қалалық сотының қылмыстық істер жөніндегі сот алқасының 2024 жылғы 25 желтоқсандағы қаулысымен сот үкімі өзгеріссіз, Талғат Арданның қорғаушысының апелляциялық шағымы қанағаттандырусыз қалдырылды.
