Әмиянды музейге 1995 жылы Ақтау қаласының тұрғыны Лесицын сыйға берген.
Әбіш Кекілбаев атындағы Маңғыстау облыстық тарихи-өлкетану музейі жалпы тарих бөлімінің меңгерушісі Бақытжан Рысбаевтың айтуынша әмиян Екінші дүниежүзілік соғыс жылдарында қолданыста болған. Жәдігердің басты ерекшелігі — адам терісінен жасалған.
— Бірақ әмиянның қай майданнан табылғаны белгісіз. Ғылыми сипаттамасы жоқ. Ғылыми айналымға енбеген. Символика ретінде, соғыстың жалпы адамзат үшін қандай қасірет екенін айқындайтын жәдігер ретінде сақталған. Аталған жәдігер бүгінде музейіміздің тарих залына қойылған, — дейді маман.
Әмиянның түгендеу карточкасында материалы адамның терісі және жіп деп жазылған. Ал, қолданыста болған кезеңі — 1941-1945 жылдар аралығы.
Әмиянның сипаттамасы: Әмиян — қоңыр түсті, адамның терісінен жасалған. Іші 4 бөліктен тұрады. Бір бөлігінің аузы теріден жасалған жапқышқа кигізіледі. Тері жапқыш кигізілген екі бөліктің арасын жібек мата бөліп тұр. Ал оған қарсы екі бөліктің арасы терімен бөлінген. Әмиянның жан-жағы жіппен тігілген, тігінен екі жағына қарай ашылады.
