Елорда прокуратурасы мемлекетке, яғни Астана қаласының әкімдігіне қарасты «City Transportation Systems» ЖШС-нің (бұрынғы атауы «Astana LRT») пайдасына қатысты сот актілерінің орындалу барысына талдау жүргізді деп жазады ҚазАқпарат.
Ақпаратта айтылғандай, борышкерлер мемлекет балансына жалпы саны 40 жылжымайтын мүлікті қайтарды. Оның ішінде 39 тұрғын үй емес жай және ауданы 12,8 га темір жолы бар асфальт-бетон зауытының жылжымайтын мүлікке қызмет көрсету жер учаскесі.
— Қайтарылған активтердің жалпы құны 920 млн теңге. Сонымен қатар мемлекеттің пайдасына құны 615 млн теңге тұратын тағы 37 мүлік нысан қаралып жатыр, — делінген хабарламада.
Осы орайда елорда прокуратурасы бұл бағыттағы жұмыстың жалғасып жатқанын хабарлап отыр.
Айта кетсек, наурызда Сыбайлас жемқорлыққа қарсы іс-қимыл агенттігі LRT ісіне қатысты жауаптыларды іздеуде ілгерілеу барын мәлімдеген еді.
2023 жылы еліміздің Бас прокуратурасы LRT ісіне қатысты жауапты тұлғалар Талғат Ардан мен Қанат Сұлтанбековті іздеу жұмысын тоқтамайтынын хабарлаған болатын.
Еске салайық, 2023 жылы мамырда елордада салынбай қалған Astana LRT құрылысына қатысты қылмыстық іс бойынша сот үкімі шықты. Сот үкімімен Талғат Ардан мен Қанат Сұлтанбеков 7 жылға сотталды.
Биыл наурызда белгілі болғандай Интерпол Талғат Арданның қайда екенін әлі анықтамады.
