15 мамырдан бастап еліміздің кинотеатрларында «Игроманка» атты фильм жарыққа шығады. Бүгін елордада кинотуындының жабық көрсетілімі өтті деп жазады ҚазАқпарат.
Фильмде бәс тігуге құмар әйелдің тағдыры баяндалады, оның үстіне кейіпкер ішімдікке тәуелді болады. Әйелдің жалғыз ұлы бар, тағдыры шытырман, ұлынан айрылғысы келмейді, бірақ, тәуелділіктен арыла алмайды. Осылайша күрес ұзаққа созылады.
- Бұл фильмнің сценарийі 2 жыл бұрын менің қолыма тиді. Бұл – маңызды тақырып, яғни ойынқұмарлық күн тәртібіндегі мәселенің бірі, екіншіден бас кейіпкер – әйел. Бұл – біздің қоғамда сирек кездесетін жайт. Сондықтан бұл картинаны қуана қабыл алдым. Фильм барлық аудиторияға арналған, отбасымен бірге көруге де болады. Кейбіреулер фильмді көріп, өзін танып, шешім қабылдауы мүмкін. Фильм сценарийін жазу, танысу барысында Қазақстанда құмар ойынға әуес жандардың көп екенін білдік. Себебі ойын, бәс түгу қолжетімді, оның үстіне ашық жарнамалайды, ал әр ойынның артында адам тағдыры тұр. Сондай-ақ лудоманиядан арылу, оңалту қиын әрі ұзақ процесс. Біз картинада басты кейіпкер арқылы сол проблеманы көрсетуге тырыстық, - деді фильм режиссері Алдияр Байракимов жабық көрсетілім барысында.
Түсірілім бір айға созылған және фильм Астанада, Бурабай, Щучьеде түсірілген.
- Фильмде басты рөлді сомдау үшін кастингтен бірнеше рет өттім және үміткерлер көп болды. Бұл картина маған кәсіби тәжірибеден бөлек, өмірлік сабақ болды. Лудоманның кейпін кешкендей болдым және ойынқұмар еместігіме тәубә еттім. Мен өзім Германияда тұрамын, Қазақстанға осы фильмге түсуге келдім, түсірілім тобы ауқымды жұмыс істеді және ұйымшыл. Түсірілім өте қызықты өтті, жазда масаға да таландық, қысқа -40 градус аязда камерамыз қатып қалды, боран болып жолда қалдық. Бұл фильмнің тағы бір ерекшелігі, тәуелділік проблемасы туралы туындыларда көбіне ер адамдардың тағдыры бейнеленеді, ал әйелдің құмар ойынға басқа да жат қылыққа тәуелді болуы мүлдем бөлек жайт. Себебі әйел – отбасының берекесі, әйел бұзылса, отбасының құты кетеді, - дейді басты рөлді сомдаған әртіс Гузель Жан.
Кинотуындыда қазақ-орыс тілі аралас өрбиді және аудармасы қатар жүреді. Сондай-ақ авторлар фильмді көруді 14 жастан жоғары аудиторияға ұсынып отыр.
- Лудомания – үлкен қасірет, емделетін дерт, бірақ статистикаға қарасақ, елімізде 400 мың азамат осы зұлматқа тәуелді екен. 400 мың адамның артында отбасы тұр, бұл біздің халық үшін ауыр проблема. 2023 жылы шығармашылық ұжым осы тақырыпты ұсынған кезде сарапшылар кеңесінің барлық мүшесі қуана қолдады. Себебі бұл қоғамда бар проблема, оны көрсетуіміз керек, құмар ойыннан аулық болу керектігін елге жеткізу керек. Бұл тақырып біздің орталық қолдайтын басты бағыттардың бірі, - деді Ұлттық киноны қолдау мемлекеттік орталығының басқарма төрағасы Құрманбек Жұмағали.
Айта кетейік, фильм Мәдениет және ақпарат министрлігінің тапсырысы бойынша және Ұлттық киноны қолдау мемлекеттік орталығының қолдауымен түсірілді.
