Үндістан Кашмирдегі Пәкістан бақылауындағы аймақтарға соққы жасағанын мәлімдеді, деп хабарлайды BBC.
Бұл шабуыл Үндістан бақылайтын Кашмир бөлігінде туристерге жасалған шабуылдан кейін бірнеше күн өткен соң орын алған. Дели бұл шабуылға қатысы бар содырларды Пәкістан қолдайды деп айыптаған болатын.
— Үнді қарулы күштері «Синдур» операциясын бастап, Үндістанға қарсы лаңкестік шабуылдар жоспарланған әрі бағытталған Пәкістан мен Пәкістан басып алған Джамму мен Кашмирдегі лаңкестік инфрақұрылымдарға соққы жасады, — делінген ресми мәлімдемеде.
Әлеуметтік желілерде үндістандық телеарналарда арнайы әскери операцияның басталғаны туралы бейнекөріністер пайда болды.
Үнді билігінің мәліметінше, операция кезінде тоғыз нысана дәл тиген.
— Біздің әрекеттеріміз мақсатты, салмақталған және арандатушылық емес сипатта болды. Ешбір пәкістандық әскери нысана шабуылға ұшыраған жоқ. Үндістан нысаналар мен шабуыл әдістерін таңдауда айтарлықтай ұстамдылық танытты, — деді ресми өкіл.
Пәкістан қарулы күштерінің өкілі Исламабад бұл шабуылға «қажетті уақытта және ыңғайлы жерде» жауап беретінін мәлімдеді.
— Әуе күштеріміздің барлық жойғыш ұшақтары көкке көтерілді. Бұл — Үндістан аумағынан жасалған арсыз әрі қорқақ шабуыл, — деді ол.
Соңғы күндері қос ел шекарасында атыстар тіркелді. Сарапшылар Үндістан 2019 және 2016 жылдардағы шабуылдардан кейінгі жағдай сияқты жауап береді деген болжам айтқан еді.
Үндістанда Пахалгамдағы террорлық шабуылға жауап қайтару нұсқалары қаралды.
Үндістан Пахалгамдағы терактіден кейін Пәкістанға қарсы шаралар жариялады.
