Табиғатпен үндесіп, қаланың қарбалас тіршілігінен бір сәт алыстауды қалайтын туристердің қатары жыл сайын артып келеді. Сондықтан бүгінде экотуризм тек демалыс түрі ғана емес, табиғатты танып-білуге, оның байлығын бағалауға мүмкіндік беретін маңызды бағытқа айналды. Осындай табиғи әлеуеті жоғары орындардың бірі – Төлеби ауданындағы «Сайрам-Өгем» мемлекеттік ұлттық табиғи паркі. Асқар таулар мен мөлдір өзендер, қалың орман мен алуан түрлі өсімдіктер дүниесі тоғысқан ұлттық паркке келушілер жыл сайын көбейіп келеді. Мұнда туристерге арналған бірнеше экологиялық маршрут әзірленген. Солардың ішінде табиғаттың ерекше сыйы саналатын Сусіңген көліне саяхаттаушылардың қызығушылығы басым.
Сусіңген көлі – Түркістан облысындағы ең ірі тау көлі әрі «Сайрам-Өгем» мемлекеттік ұлттық табиғи паркінің інжу-маржаны саналады. Көл Қаржантау жотасының оңтүстік беткейінде, теңіз деңгейінен 1900 метр биіктікте орналасқан. Аумағы шамамен 3,5 мың шаршы метрді құрайды. Табиғи ерекшелігіне байланысты көлдің суы мезгіл-мезгіл тартылып отырады. Оның «Сусіңген» деп аталуына да осы құбылыс себеп болған.
Көлдің солтүстік бөлігінен Құлыншақ тауы мен Қыржылсай асуының арасындағы көптеген бұлақтар қосылып, Сусіңген өзенін түзеді. Көлдің батыс және солтүстік жағалауындағы бұлақтар мөлдір ауыз су көзі ретінде белгілі. Табиғаттың тылсым құбылыстарының бірі – Сусіңген көлінен жер астына сіңген судың Шымкент қаласындағы Қошқарата өзені мен Қазығұрт тауының етегіндегі Ақбура бұлағынан қайта жер бетіне шығуы.
Көлде дақты форель мен осман балығы мекендейді. Оның әсем табиғатын тамашалауға келген туристер көлге жаяу немесе атпен жетеді. Демалушылар көл жағасында тынығып, мөлдір суына шомылып, балық аулап, шығыс бөлігіндегі көрікті жылғалар мен тау соқпақтарын аралап, табиғат аясында ерекше әсерге бөленеді.
