Емдік-сауықтыру туризмнің дамып келе жатқан бағытының бірі. Еліміздің әр өңірі табиғи ерекшелігіне, географиялық орналасу аймағына қарай демалушыларға түрлі бағыттағы емдік-сауықтыру қызметтерін ұсынып келеді. Экотуризмі жолға қойылған Төлеби ауданының тұрғындары ежелден төрт түліктің төресі жылқы баптаған. Биес сауып, құрт шайқаған. Бүгінде осы атакәсіптерін тұрғындар туризм саласына бейімдеп, саумалмен емдеу орталықтарын ашуда. Осындай орталықтың бірі - төлебилік кәсіпкер – Нұрболат Әбілдаевтың орталығы. Қоғалы ауылдық округі Диханкөл елді мекенінде жеке кәсіпкер 23 адамға арналған емдеу-сауықтыру орталығын іске қосқан. Саумалмен емделушілер еліміздің Атырау, Ақтау, Ақтөбе, Қызылорда, Түркістан облыстарынан арнайы келіп, орталықта тынығып, ем алуда. Демалушыларға емдік өнімді әзірлеу үшін 5 бие сауылады. Қымызбен емдеудің бір курсы он күнді құраса, әрбір адам күніне бір литр саумал ішуі тиіс екен. Саумал – жаңа сауылған бие сүті. Одан қымыз ашытылады. Кейде суытып, қымыздың қорына қосылған сүтін «саумал» деп те атайды. Қымыз ішіп, дертіне дауа тапқандар орталықта үш мезгіл тамақ, 4 мезгіл саумал ішіп, тынығуда. Сауықтыру орталығында 10 бөлме бар, ауласына абаттандыру жұмыстары жүргізілген. Күндік бағасы 14000 теңге.
Шымкент қаласынан 47 км қашықтықта орналасқан орталық 2021 жылы ашылған. Төрт жылдан бері бұл мекен еліміздің түкпір-түкпірінен келетін демалушылардың сүйікті орнына айналған. Демалушылар мұнда қалауына қарай төңіректің тамаша табиғатын аралай алады.
