Кейінгі 5 жылда өңірде онкологиялық аурулардың жаңадан анықталуы 21,6 пайызға өсіп отыр деп жазады ҚазАқпарат.
Аурушаңдық әсіресе Ленгір мен Арыс қаласында және Бәйдібек, Ордабасы, Отырар аудандарында жоғарғы көрсеткішке ие. Кентау қаласында өткен жылы 85 науқас «Д» есепке алынған. 2020 жылмен салыстырғанда көрсеткіш 56,2 пайызға жоғары.
Дәрігерлердің сөзіне сүйенсек, қаладағы халық санының азаюына байланысты жаңадан анықталған науқастардың саны төмендеп, көрсеткіші жоғарылаған.
Түркістан қаласында 41 сүт безі қатерлі ісігі, 24 асқазан қатерлі ісігі, 23 жатыр мойны қатерлі ісігі, 22 өкпе қатерлі ісігі, 19 терінің қатерлі ісігі тіркелген. Ал, онкологиялық аурудан 5 жыл ішінде өңірде 4234 адам қайтыс болды. Атап айтар болсақ, 2020 жылы 943, 2021 жылы 930, 2022 жылы 879, 2023 жылы 810, 2024 жылы 672 адам дүниеден өткен.
Дәрігерлер онкологиялық аурулардың алдын алудың ең тиімді жолы скринингтік және профилактикалық тексерулермен халықты толықтай қамту екендігін айтып отыр.
— Онкологиялық аурулар бойынша жылдан жылға өсім байқалады. Өсу барысы бірінші, екінші дейгей болса, ол уақытылы анықталып жатыр деген сөз. Бұл жағдайда науқасты емдеуге, жасын ұзартуға болады. Ал, анықталмай, өлім көрсеткіші өсіп, аурушылар төмендесе — бұл өте қауіпті. Сондықтан, өлім көрсеткішінің төмендеп, науқастанушылардың көп анықталуына мән беру керек, - деді Түркістан облыстық денсаулық сақтау басқармасының басшының орынбасары Бауыржан Сатыбалды.
