Жетісайлық диқандар қырыққабаттың алғашқы өнімін экспорттауды бастады деп жазады ҚазАқпарат.
Жетісай ауданына қарасты Ж.Ералиев ауылдық округіндегі «Орынбай ата» шаруа қожалығы қырыққабаттың алғашқы өнімдерін Ресей еліне экспорттап жатыр. Шаруа 1 гектар аумаққа қырыққабаттың ерте пісетін «магнус» сортын еккен болатын.
Қазір егістік басында орамжапырақтың әр келісі 250 теңгеден саудаланып жатыр. Жақын арада 2 гектар алқапқа егілген «зарисма» тұқымы да өнім беретін болады. Одан бөлек, шаруа тағы 6 гектарға қауынның «аэропорт» сортын өсірмек ниетте.
— 45-50 күнде пісетін көкөніс бүгін алғашқы өнімді беріп жатыр. 1 гектарға егілген 32 мың түп көшеттен мол өнім алудамыз. Бұл кеткен шығындарымыз бен төккен теріміздің толықтай ақталғанын білдіреді. Қырыққабатты Ресей федерациясының Пермь қаласына сатуға жіберудеміз, — деді «Орынбай ата» шаруа қожалығының төрағасы Нұрлыбек Жайынбаев.
Жетісай аудандық ауыл шаруашылығы және жер қатынастар бөлімінің мәліметінше, өңірде биыл 1158 гектар аумаққа ерте пісетін қырыққабат егілген. Болжам бойынша 50 мың тоннаға жуық өнім алу жоспарланып отыр. «Зарисма», «Валикор», «Магнус», «Ринда», «Заказ» сынды қырыққабат сорттары егілген алқаптың 893 гектарына су үнемдеу технологиясы енгізілген. Өткен жылы аудан диқандары 1287 гектар жерге қырыққабат дақылын егіп, гектарынан орта есеппен 30 центнерден өнімін өндірді. Негізінен ерте пісетін қырыққабаттың басым бөлігі Ресей, Беларусь және Еуропа елдеріне экспортталады.
