Ауыл шаруашылығы министрлігіндегілер Kazinform сауалына жолдаған жауапта киік таптаған жайылымның шығынын субсидиямен толтыру мүмкін емес екенін айтты.
Министрлік оның орнына жайылымдарды тормен қоршау шығындарының пайызын субсидиялауды ұсынып отыр деп жазады ҚазАқпарат.
— Ақбөкендердің жайылымға келтірген залалын объективті бағалау мәселесі бар. Залалды есептеу қиын және сыбайлас жемқорлық тәуекелдері туындауы ықтимал. Әкімшілендірудің күрделілігі және ашық процедуралардың болмауы жергілікті бюджеттің тиімсіз жұмсалуына әкелуі мүмкін, өйткені шөптің мөлшері мен нақты залалды дәл анықтау мүмкін емес, — деп жазылған министрлік мәліметінде.
Бірақ бұл киік популяциясынан зардап шеккен шаруаларға мемлекет көмек көрсетуден бас тартып отыр деген сөз емес.
— Ауыл шаруашылығы жерлерін киіктерден қоршауға арналған топсалы торларды қума метрін 700 теңге және топсалы торды бекітуге арналған бағандарды (металл немесе бетон) бір данасын 3 750 теңге сатып алу кезінде инвестициялық салымдарды өтеу үлесі жергілікті бюджет қаражаты есебінен 50% субсидияланады, — деп жазады ведомство мамандары.
