Бүгін eGov порталында бірінші сыныпқа құжат қабылдау басталды. Алайда қазақстандықтар техникалық ақауларға тап болды деп жазады ҚазАқпарат.
Жүйедегі ақау себебін ҚР Цифрлық даму, инновациялар және аэроғарыш өнеркәсібі вице-министрі Ростислав Коняшкин түсіндірді.
Вице-министр расында да, электрондық үкімет платформасында қысқамерзімді ақаулар байқалғанын, бұл мектепке қабылдау қызметін пайдаланушылардың тым көп болуымен байланысты екенін айтты.
— Дегенмен, аз уақытта платформа қалпына келтірілді. Қызметті іске қосу 15:00–ге жоспарланған болатын, сәйкесінше, 15:00–де портал қалыпты жұмысына кіріседі. eGov — азаматтардың электрондық үкіметпен байланысуына арналған терезе іспетті ғана жүйе. Оның артында барлық мемлекеттік органдардың ақпараттық жүйелерімен біріктірілген 2000-нан астам интеграциялық сервис бар. Осы сервистердің біреуі істемей қалса, онымен байланысты барлық қызметтер де уақытша қолжетімсіз болады, — деді Р. Коняшкин Үкіметте өткен брифингте.
Сонымен бірге, спикер eGov — өте ауқымды экожүйе екенін атап өтті.
— Бүгін министр Жаслан Мәдиев жаңа eGov 3.0 жүйесін іске қосатынымыз туралы баяндама жасады. Бұл — толық жаңартылған, қайта жасалған портал. Өткен жылдан бері біз кейбір компоненттерді іске қоса бастадық, олардың бір бөлігі биыл жаңартылып жатыр. Екі жылда барлық сервистер мен компоненттер жаңартылады. Ал биыл жаңартылған, ыңғайлы әрі тұрақты жұмыс істейтін порталдың жаңа нұсқасын көресіздер, — деді Ростислав Коняшкин.
Бұған дейін Жаслан Мәдиев eGov порталын жаңғырту жұмыстары қалай жүретінін айтып берген еді.
