Мәжіліс депутаты Асхат Аймағамбетов неліктен біз дәрі-дәрмекке, емдеу қызметтеріне, кітаптарға және картадан картаға аударымдарға 0% ҚҚС ұсынғанын түсіндіріп өтті деп жазады ҚазАқпарат.
Бұл туралы Асхат Аймағамбетов әлеуметтік желідегі парақшасында жазды.
— Салық кодексіне қатысты бір топ депутаттың ұсынған түзетулері туралы пост жариялаған соң, бірқатар сұрақ келіп түсті. Әсіресе неге дәрі-дәрмекке, медициналық қызметтерге, кітаптарға және банк аударымдарына ҚҚС салмау керек деген сұрақтар жиі қойылады, — деп жазды депутат.
Ол дәрі-дәрмек пен емдеу қызметтеріне тоқталып өтті.
— Біз ауыр, созылмалы және өмірге қауіп төндіретін көптеген ауру бойынша дәрі-дәрмек пен емдеуге қазіргі 0% ҚҚС мөлшерлемесін сақтап қалуды ұсынамыз. Мысалы: онкология, диабет, сирек кездесетін немесе аутоиммундық тағы басқа аурулар. Неге? Себебі салықтың өсуі — бағаның өсуі. Ал дәрі-дәрмектің бағасының өсуі — бірінші кезекте науқастар мен олардың отбасыларына ауыр салмақ. Бұл жай ғана салық мәселесі емес, бұл — адамгершілікке қатысты шешім. Онко-дәрілер мен сирек ауруларға арналған препараттардың бағасы қазірдің өзінде өте жоғары. Егер оларға ҚҚС енгізілсе — бұл бағаның бірден 10%-ға өсуі деген сөз, — деді Асхат Аймағамбетов.
Депутат ҚҚС-тан босату — мәдениетке, білімге, ұлттық ойға көрсетілген құрмет екенін атап өтті.
— Отандық кітаптар мен анимация. Кітапқа ҚҚС салу — отандық авторлар үшін шығарылым құнын арттырады. Ал бұл — оқырман үшін кітаптың бағасының көтерілуіне әкеледі. Қазақ авторлары назардан тыс қалды деп айтып жүрміз — дегенмен, соның өзінде кітапқа салық салып отырмыз. ҚҚС-тан босату — мәдениетке, білімге, ұлттық ойға көрсетілген құрмет. Біз өз авторларымызды, аудармашыларымызды, суретшілерімізді қолдауымыз керек. Сол сияқты анимация да — енді дамып келе жатқан сала. Қазақ тіліндегі сапалы мультфильмдер өте аз. Бұл саланы салықпен емес, нақты қолдаумен көтеруіміз қажет, — деді ол.
Асхат Аймағамбетов егер банктік аударымдар мен карточка арқылы төлемдерге ҚҚС енгізілсе — халық күнделікті қолданып жүрген қарапайым қызметтер қымбаттап кетуі мүмкін екенін айтты.
— Қаржылық қызметтер. Көптеген елде банк қызметтеріне ҚҚС салынбайды — бұл жайдан-жай емес. Бізде де қазіргі таңда бұл қызметтер ҚҚС-тан босатылған. Егер банктік аударымдар мен карточка арқылы төлемдерге ҚҚС енгізілсе — халық күнделікті қолданып жүрген қарапайым қызметтер қымбаттап кетуі мүмкін. Мысалы, сіз Халық банктегі картаңыздан Kaspi-ге ақша аудардыңыз — 200 теңге комиссия төледіңіз. Егер оған ҚҚС қосылса, тағы 32 теңгеге дейін қосылуы әбден мүмкін. Бұл, әсіресе, жиі аударым жасайтындар үшін ауыр. Зардап шегетіндер — қарапайым халық: студенттер, ата-аналар мен шағын кәсіп иелері, — деді Асхат Аймағамбетов.
Дәрі-дәрмекке салынатын салық пен казинодағы ұтысқа салынатын салық бірдей болмауы тиіс.
Сондықтан біз мыналарды да ұсындық:
— букмекерлік кеңселер мен казиноларға салықты көтеру,
— трансмай қосылған өнімдерге акциз енгізу,
— банктерге салынатын корпоративтік табыс салығының мөлшерлемесін арттыру.
— Мәселе «бәрін бәрінен босатуда» емес. Мәселе — әділ әрі теңгерімді салық жүйесін қалыптастыруда. Талқылау әлі жалғасып жатыр. Ұсыныстар көп: ҚҚС-қа тіркеу шегіне, салық мөлшерлемелеріне, түрлі салаларға қатысты. Әрине, әркім өзіне тікелей әсер ететін мәселеге назар аударады — бұл туралы да жазып отырамыз. Ең бастысы — осы ұсыныстар жұмыс тобы мен Мәжілісте болашақта қаралып, алдағы уақытта қолдау табады деп үміттенеміз, — деп жазды ол.
