Денсаулық сақтау министрлігі 2025 жылғы 28 наурызда биологиялық белсенді тағамдық қоспаларды (ББҚ) сәйкестендіру құралдарымен таңбалау бойынша пилоттық жобаны іске қосу туралы бұйрық шығарды деп жазады ҚазАқпарат.
Пилоттық жобаның мақсаты - биологиялық белсенді тағамдық қоспаларды (ББҚ) сәйкестендіру құралдарымен таңбалау тетігінің толықтығын, тиімділігін, нәтижелілігін және жеткіліктілігін сынақтан өткізу. Міндеті – тауарлардың түпнұсқалығын растау, Қазақстан Республикасының аумағына ББҚ-ны (оның ішінде контрафактілік өнімдерді) заңсыз әкелуге, өндіруге және айналыммен күрес. Сол сияқты заңнамада көзделмеген ББҚ айналымы мен өндірісінің схемаларын жою мақсатында айналымға қатысушылар арасында өзара қарым-қатынас орнату. ББҚ айналымын есепке алу рәсімдерін стандарттау және біріздендіру.
Сонымен қатар, бұл жоба арқылы ББҚ-ны сәйкестендіру құралдарымен міндетті таңбалауға көшу қажеттілігі айқындалады.
Пилоттық жобаға кімдер қатыса алады?
– Денсаулық сақтау министрлігі;
– Сауда және интеграция министрлігі;
– Денсаулық сақтау министрлігінің Санитариялық-эпидемиологиялық бақылау комитеті;
– Ұлттық сараптама орталығы.
Биологиялық белсенді қоспалар айналымы саласындағы субъектілер:
- отандық ББҚ өндірушілер;
- импорттаушылар және олардың ел аумағындағы өкілдіктері (дистрибьюторлар);
- көтерме сауда ұйымдары;
- бөлшек сауда ұйымдары;
– Тауарларды таңбалау және қадағалау ақпараттық жүйесінің әкімшісі;
– фискалдық деректер операторы.
Пилоттық жобаға қатысу ерікті түрде жүзеге асырылады.
ББҚ айналымына қатысушылар тіркелу үшін өтінім береді және пилоттық жобаның басталуына қарамастан, өтінімдер қабылдау жалғаса береді.
Жоба аясында ББҚ айналымына қатысушылар өз бетінше сәйкестендіру құралдарымен таңбалау жүргізіп, тиісті мәліметтерді тапсырады.
ББҚ таңбалау келесі жағдайда жүзеге асырылады:
– Қазақстан аумағында өндірілген ББҚ – өнім қоймаға жөнелтілгенге дейін өндіріс орнында;
– ЕАЭО-ға мүше емес елдерден Қазақстан аумағына импортталатын ББҚ – ЕАЭО кеден аумағына әкелгенге дейін;
– ЕАЭО-ға мүше мемлекеттерден Қазақстанға әкелінетін ББҚ – Қазақстан Республикасының мемлекеттік шекарасынан тыс, ЕАЭО мүше мемлекеттерінен әкелу алдында.
Сонымен қатар пилоттық жобаны іске асыру бойынша жұмыс тобының құрамы мен сыртқы экономикалық қызметтің тауар номенклатурасының кодтары көрсетілген тауарлар тізбесі бекітілді.
Бұйрық қол қойылған күнінен бастап күшіне енеді.
