Төлеби ауданындағы киелі орындар – рухани құндылық пен тарихи мұраны ұштастырған ерекше нысандар. Мұндай мекендер халқымыздың ғасырлар бойы қалыптасқан дүниетанымы мен салт-дәстүрін танытып қана қоймай, рухани туризмнің дамуына да серпін беріп келеді. Бүгінде бұл жерлерге еліміздің түкпір-түкпірінен ғана емес, алыс-жақын шетелдерден де зияратшылар арнайы ат басын бұрады.
Солардың ең танымалдарының бірі – Қазығұрт тауының баурайында орналасқан "Ғайып Ерен Қырық Шілтен" әулиелі мекені. Ел аузындағы аңыздарға сүйенсек, ерте заманда қасиетті жерлерді аралап жүрген қырық әулие осы маңға келіп қоныстанып, түнеген екен. Содан бері бұл орын халық арасында «Ғайып Ерен Қырық Шілтен» деген атаумен белгілі болып келеді. Ал маңайындағы шипалы бұлақтарға түрлі дертке дауа іздеген зияратшылар үзілмей келеді.
Бұл киелі мекен Кеңес дәуірінде біраз уақыт қараусыз қалғанымен, 1993 жылдан бастап қайта жаңғыртылып, бүгінде зияратшылар үзілмейтін орынға айналған. Мұнда Қазақстанның барлық өңірінен бөлек, Өзбекстан, Қырғызстан, Ресей және өзге де мемлекеттерден келушілер көп. Киелі орын қызметкерлерінің айтуынша, келушілерге бұл жердің ең алдымен туристік нысан емес, зиярат орны екені түсіндіріледі. Өйткені мұнда ең бастысы – адамның ниеті, иманы мен рухани тазалығы.
Киелі орынның кіреберісінде өсіп тұрған алып тұт ағашы – молшылық пен берекенің белгісі саналады. Ал жоғары көтерілгенде зияратшыларды ұзындығы шамамен 20 метр, биіктігі 10 метрге жуық "Ата мен Ана" деп аталатын қос алып жартас қарсы алады. Ел арасында осы екі жартастың арасынан ақ ниетпен өткен адамның бойындағы ауыртпалық сейіліп, рухани тазарады деген сенім қалыптасқан. Сондықтан мұнда келгендердің басым бөлігі осы рәсімді орындап, дұға жасап қайтады.
"Ғайып Ерен Қырық Шілтен" аумағындағы үш бұлақтың әрқайсысының өзіндік шипалық қасиеті бар деген түсінік сақталған. Бір бұлақтың суы көз ауруларына, екіншісі тыныс жолдары мен асқазан сырқаттарына, үшіншісі жүйке жүйесіне пайдалы деп есептеледі. Бұл сенім де киелі орынға келушілердің қызығушылығын арттыра түседі.
Соңғы жылдары мұнда келушілерге қолайлы жағдай жасау мақсатында инфрақұрылым айтарлықтай жақсарған. Аумағында 100 орындық заманауи қонақүй салынып, ұлттық нақыштағы киіз үйлер мен жазғы асхана пайдалануға берілген. Алдағы уақытта намазхана, кітапхана және шағын медресе ашу жоспарланып отыр.
Тарих, руханият және табиғат үйлесім тапқан "Ғайып Ерен Қырық Шілтен" бүгінде Төлеби ауданының ғана емес, Түркістан өңірінің ең маңызды зиярат орындарының біріне айналып, рухани туризмнің дамуына елеулі үлес қосып келеді.
