Қазіргі таңда Төлебиде туризм саласында қызмет көрсететін Ақмешіт, Біркөлік шатқалдарында, Сайрам-Өгем, Қасқасу, Көксәйек, Төңкеріс елді мекендерінде орналасқан 254 нысан бар. Мамандардың айтуынша алдағы уақытта «Біркөлік шатқалында» - 5 нысан, «Ақ мешіт» шатқалында - 3, «Қасқасуда» - 2, Керегетаста – 1, «Қаратөбе» ауылдық округінде - 1 туристік нысан бой көтермек.
Біркөлік шатқалы – қазір Төлеби өңіріндегі туризмді аймақтың бірі. Шатқал етегінде көптеген демалыс орындары туристерге сапалы қызмет көрсетіп келеді. Солардың бірі «Маяк» демалыс орны.
Мүлгіген тыныштық, тау аңғарлары, ағып жатқан өзен, жап-жасыл пейзаж «Маяктың» - басты ерекшелігі.
Мұнда: ағаштан жасалған үйлер, табиғат келбетін тамашалай алатын тапшандар, ересектерге және балаларға арналған бассайн, монша, кафе демалушылар үшін жұмыс істейді.
Нысан демалыссыз жұмыс істейді. Сондықтан қаланың қу тіршілігінен шаршасаңыз кез-келген уақытта «Маякта» отбасыңызбен тыныштықта, табиғат аясында демалуыңызға болады.
