Төлеби ауданы табиғатының көркемдігімен ғана емес, киелі орындарының көптігімен де ерекшеленеді. Өңірде этнотуризм мен рухани туризм қатар дамып келеді. Тарихы терең, халық арасында қасиетімен танылған әулиелі мекендер бүгінде зияратшылармен қатар, өңірдің өткені мен құпиясына қызығатын туристерді де өзіне тартып отыр.
Сондай қасиетті орындардың бірі – Қаратөбе ауылдық округіне қарасты Майбұлақ ауылындағы "Нұр ата әулие" кесенесі. Майбұлақ өзенінің аңғарында орналасқан бұл мекенді жергілікті халық ежелден қастерлеп келеді. Кесене маңы абаттандырылып, зиярат етушілерге барлық жағдай жасалған.
Нұр ата әулиелі мекенінің басты ерекшелігі – кесене маңынан бастау алатын шипалы бұлақтар. Ел арасында бұл бұлақтардың суы адамның он екі мүшесіне ем болады деген сенім қалыптасқан. Қыстың қақаған аязында да қатпайтын жылы бұлақтар бірнеше көзден шығып, бір арнаға тоғысады. Әр бұлақтың суы халық арасында бас, жүрек, өкпе, бауыр, бүйрек, асқазан, көз және басқа да ағзаларға пайдалы деп аталып кеткен. Ал ең мол қайнап шығатын бұлақ «Несібе суы» деп аталады.
Жергілікті жұрт бұл бұлақтардың емдік қасиеті ерте заманнан белгілі екенін айтады. Бұрынғы қариялар түрлі індетке шалдыққан малдарын осы бұлақтың маңына әкеліп қондырып, дертінен айықтырған деседі. Бүгінде де еліміздің түкпір-түкпірінен келетін зияратшылар бұлақ суынан дәм татып, шипа іздейді. Мамандар жүргізген зерттеулерде де бұлақ суларының минералдық құрамы әртүрлі екені анықталғаны айтылады.
Тарихи деректерге сүйенсек, Нұр ата Қарахан мемлекеті дәуірінде өмір сүрген, ислам дінін насихаттап, елге адал қызмет еткен, әділдігімен, кішіпейілдігімен және көрегендігімен танылған тұлға болған. Көзі тірісінде өзін әулие санамағанымен, халық оның ерекше қасиеттерін бағалап, өмірден өткеннен кейін қасиетті тұлға ретінде құрмет тұтқан. Содан бері бұл мекенге келушілер Алладан медет тілеп, дұға жасап, рухани тыныштық іздеп келеді.
Орта Азияда Нұр ата есімімен аталатын төрт киелі орын болса, соның бірі дәл осы Төлеби ауданында орналасқан. Бұл мекеннің тарихи және рухани құндылығы жыл өткен сайын артып келеді.
Тәуелсіздік жылдарында Нұр ата кесенесі бірнеше кезеңмен қайта жаңғыртылып, абаттандырылды. Жергілікті тұрғындар мен туған жеріне жанашыр азаматтардың қолдауымен мешіт, асхана салынып, кесене ұлттық сәулет үлгісіне сай қайта жөнделді. Жаяу жүргіншілер жолы төселіп, келушілерге арналған демалыс орындары жасақталды.
Бүгінде Нұр ата әулиелі мекені – тек зиярат орны ғана емес, Төлеби ауданындағы рухани туризмнің маңызды бағыттарының біріне айналған. Табиғаттың көркемдігі мен ғасырлардан жеткен рухани мұра тоғысқан бұл мекен өңірдің туристік әлеуетін арттыра түсетін бірегей нысандардың қатарында.
