Төлеби ауданында қарқынды дамып келе жатқан туризм бағыттарының бірі – емдік туризм. Табиғаты таза, ауасы шипалы өңірде саумалмен емдеу дәстүрі қайта жаңғырып, бұл бағытқа қызығушылардың қатары жылдан-жылға артып келеді. Әсіресе балдай тәтті қымызымен танылған Диханкөл ауылы бүгінде саумалмен сауықтыру орталықтары шоғырланған мекенге айналған.
Солардың бірі – «Дихан тау» саумалмен сауықтыру орталығы. Нысан екі жыл бұрын «Бизнестің жол картасы 2025» мемлекеттік бағдарламасы мен «Кәсіпкерлік қырандары» жобасы аясында қаржыландырылып, пайдалануға берілген. Бүгінде орталыққа аудан мен облыс тұрғындарымен қатар еліміздің өзге өңірлерінен де келушілер жиі ат басын бұрады.
Құны 57 миллион теңгені құрайтын кешен бір мезгілде 25 отбасыны қабылдай алады. Мұнда келушілерге жайлы жатын орын, үш мезгіл ыстық ас және күніне төрт рет саумал ішу мүмкіндігі ұсынылады. Заманауи талапқа сай жабдықталған 15 бөлмеден тұратын орталық табиғат аясында тынығып, денсаулығын нығайтуды қалайтын жандарға қолайлы жағдай жасаған.
Кешеннің айналасы да ерекше күтімге алынған. Жеміс ағаштары жайқалған аумақта жазғы демалысқа арналған тапшандар, бассейн және атпен серуендеуге арналған арнайы орындар қарастырылған. Сонымен қатар саумалдың табиғи қалпын сақтау мақсатында бие байлап, қымыз дайындайтын арнайы орын да ұйымдастырылған.
Табиғатпен үндескен тыныш орта, ұлттық ем-дом дәстүрі және сапалы қызметтің үйлесімі «Дихан тау» сауықтыру орталығын Төлеби ауданындағы емдік туризмнің жарқын үлгелерінің біріне айналдырып отыр. Мұндай жобалар өңірдің туристік әлеуетін арттырып қана қоймай, ұлттық дәстүрге негізделген сауықтыру мәдениетін дамытуға да тың серпін беруде.
